Рейтинг@Mail.ru Архив RSS Карта сайта
Православие.Ru Поместные Церкви Православный Календарь English version
ПРАВОСЛАВИЕ.RU Православный Календарь на 2008 год
ПРАВОСЛАВИЕ.RU карта сайтаПРАВОСЛАВНЫЙ КАЛЕНДАРЬ »  Молитвы




Рейтинг@Mail.ru


Тропари соборам святых

Тропарь. Всем святым.

Всех Святых * Икона Всех святых Икона.Молитвы.ХрамыСвятыни

Иже во всем мире мученик Твоих, / яко багряницею и виссом, / кровьми церковь Твоя украсившися, / теми вопиет Ти, Христе Боже: / людем Твоим щедроты Твоя низпосли, / мир жительству Твоему даруй / и душам нашим велию милость.

Тропарь. Свв. отцам I-го Вселенского Собора.

Первый Вселенский СоборМолитвы.

Препрославен еси, Христе Боже наш, / светила на земли отцы наша основавый / и теми ко истенней вере вся ны наставивый, / Многоблагоутробне, слава Тебе

Тропарь. Собору Вологодских святых.

Празднество в Вологде всем преподобным отцам Вологодским * Молитвы.

Яко светильницы всесветлии, / явистеся в пределех града Вологды, преподобнии отцы наши, Вологодстии чудотворцы: / вы бо, крест Христов от юности своея на рамена вземше, / усердно Тому последовали есте, / чистотою Богови при ближившеся, / от Негоже и чудес даров нием обогатистеся; / темже и мы, с верою к вам притекающе, умильно глаголем: отцы преподобнии, молите Христа Бога спастися душам нашим.

Величание. .

Празднество в Вологде всем преподобным отцам Вологодским * Молитвы.

Величаем вас, / чудотворцы наши славнии Вологодстии, / страну северну лучами добродетелей озарившии / и образ спасения верным / светоявленно показавшии.

Тропарь. Свв. отцам VII-го Вселенского Собора.

Седьмой Вселенский Собор * Седьмой Вселенский Собор Икона.Молитвы.

Препрославлен еси, Христе Боже наш, / светила на земли отцы наша основавый / и теми ко истинней вере вся ны наставивый. / Многоблагоутробне, слава Тебе.

Тропарь. Собору Белорусских святых.

Собор Белорусских святых * Молитвы.

Почти Господь Белорусский край / святыми, Ему благоугодившими: / святители, мученики, преподобными и праведными, / верно Господеви послужившими / и мзду трудов приявшими. / К тем же ныне и мы вопием: / о нас молитеся ко Господу, / да в вере и делех плод добр принесём

Величание. .

Собор Белорусских святых * Молитвы.

Величаем вас, / святии Белорусския земли, / и чтим святую память вашу, / вы бо молите о нас / Христа Бога нашего.

Тропарь. Собору Владимирских святых.

Собор Владимирских святых * Собор Владимирских Святых Икона.Молитвы.Святыни

Днесь светло красуется Пресвятыя Богородицы избранный град / и с ним вси концы земли Владимирския торжествуют, / память совершающе богопрославленнаго великаго лика святых, / в подвизех Православныя веры издревле во уделе сем Богу угодивших, / и к ним с любовию вопиют: / о, предивнии Христу Богу молитвенницы, / венцы пресветлыми от Него увенчанныя, / мир и благоденствие отечеству вашему испросите / и душам нашим велию милость.

Тропарь. Собору всех Волынских святых.

Собор Волынских святых * Молитвы.

Приспе день светлаго торжества, / людии Волынстии радуются, / и с ними вся Российская Церковь ликовствует / во псалмех и пениих, и песнех духовных днесь бо, яко же солнце незаходимое, всем возсия память / святых и Богомужных угодников и чудотворцев Волынских / святителя Стефана чуднаго, / иерархом Волынским первопрестольника, / и святаго благовернаго Ярополка, / блаженнаго страдальца Богомужнаго, / и с ними Амфилохия святителя Волынскаго, / и победоноснаго Феодора, Острожскаго князя Богодарованнаго, / и преподобнаго Иова Почаевскаго присноблаженнаго, / ихже молитвами, Господи, / землю отеческую нашу в Православии и мире утверди, / и спаси всех имуще купно о нас Молитвенницу усердную, / Пресвятую Матерь Свою Богородицу, / благодатне сияющую в цельбоносней стопе Своей / и чудотворней иконе на горе Почаевстей / и заступленьми прочих угодников Волынския паствы, / Иулиании, блаженныя девы Ольшанския, / и святаго преподобномученика Макария, архимандрита Овручскаго.

Тропарь. Всем преподобным и богоносным отцам, во Св. Горе Афонской просиявшим.

Собор всех преподобных и богоносных отцев во Святой Горе Афонской просиявших * Молитвы.

Пустыни Афонския отцы, / Ангелы во плоти, / исповедники вкупе и преподобныя, / святители же и мученики в пениих почтим, / подражающе добродетелем их, / зовуще согласно и глаголюще: / слава Прославльшему вы, / слава Венчавшему вы, / слава в бедах предстатели нам вы Показавшему.

Величание. .

Собор всех преподобных и богоносных отцев во Святой Горе Афонской просиявших * Молитвы.

Ублажаем вас, / преподобнии отцы Афонстии, / в Горе сей постившиися, / и чтим святую память вашу, / наставницы монахов / и собеседницы Ангелов

Тропарь. Собору всех преподобных отцев Киево-Печерских.

Собор всех преподобных отцев Киево-Печерских. * Собор Печерских святых Икона.Молитвы.Святыни

Егда снидосте во гробы / и самех себе заключисте, / тогда, страсти умертвивше плотския, / спогребостеся Христу, Богоноснии, / и диавольския в подземных разрушисте ограды, / сего ради Ангели венцы с Небес вам подают.

Тропарь. Всем святым, в земли Российской просиявшим.

Собор всех святых в земле Российской просиявших. * Собор всех святых в земле Русской просиявших. Икона.Молитвы.ХрамыСвятыни

Якоже плод красный Твоего спасительнаго сеяния, / земля Российская приносит Ти, Господи, / и вся святыя в той просиявшия. / Тех молитвами в мире глубоце / церковь и страну нашу Богородицею соблюди, Многомилостиве.

Величание. .

Собор всех святых в земле Российской просиявших. * Собор всех святых в земле Русской просиявших. Икона.Молитвы.ХрамыСвятыни

Ублажаем вас, / чудотворцы наши славнии,/ землю Русскую добродетельми вашими озарившии / и образ спасения нам / светоявленно показавшии.

Тропарь. Собору Костромских святых.

Собор Костромских святых * Собор Костромских Святых Икона.Молитвы.

Днесь град Кострома вельми вами хвалится: / в пределах бо земли Костромския, / яко звезды светозарныя, возсиявше, / чудесы своими вся озарили есте / и ныне молитеся ко Господу, отцы преблаженнии, / Геннадие, Паисие, Авраамие, / Иакове, Макарие и Пахомие, / со инеми многими нашего края Небесными покровителями / за град Кострому и всяк град, и страну, и люди, / верою и любовию вас почитающия, / и о спасении душ наших.

Величание. .

Собор Костромских святых * Собор Костромских Святых Икона.Молитвы.

Ублажаем вас, / преподобне отче наш Геннадие / и всех святых отцев собор, Костромскаго края покровителей, / вы бо молите за нас / Христа Бога нашего.

Тропарь. Чудотворцам Новгородским.

Собор Новгородских святых * Собор Новгородских Святых Икона.Молитвы.

Яко всесветлии светильницы, / явистеся во стране сей, / святителие Новгородстии, преподобнии, и Христа ради юродивии, и вси праведнии, / постом насаждении воздержанием напаяеми, /сего ради и сподобистеся быти приятелище Божия Духа / и чудеса действовати, / молите Христа Бога за вся люди, / спастися душам нашим.

Тропарь. Преподобным Новгородским.

Собор Новгородских святых * Собор Новгородских Святых Икона.Молитвы.

Пустынное житие возлюбивше, преподобнии отцы, / явистеся Новгородстей стране, яко иное солнце, / озаряюще сию молниями чудес ваших, / и просвещаете верою воспевающих вам: / радуйтеся, постников похвало и праведных удобрение

Тропарь. Новомученикам и исповедникам Российским.

Собор новомучениковСобор новомучеников и исповедников Российских * Собор новых мучеников и исповедников Российских, за Христа пострадавших, явленных и неявленных Икона.Молитвы.ХрамыСвятыни

Днесь радостно ликует Церковь Русская, / яко мати чада, прославляющи новомученики и исповедники своя: / святители и иереи, / царственныя страстотерпцы, благоверныя князи и княгини, / преподобныя мужи и жены / и вся православныя христианы, / во дни гонения безбожнаго жизнь свою за веру во Христа положившия / и кровьми Истину соблюдшия. / Тех предстательством, Долготерпеливе Господи, / страну нашу в Православии сохрани / до скончания века.

Тропарь. Собору Преподобных отцев и старцев, в Оптиной пустыни просиявших.

Собор преподобных Оптинских старцев * Молитвы.Святыни

Православныя веры светильницы, / монашества непоколебимии столпи, земли Российския утешителие, / преподобнии старцы Оптинстии, / любовь Христову стяжавшии и души своя за чада полагавшии, / молитеся ко Господу, / да утвердит земное отечество наше в православии и благочестии и спасет души наша.

Тропарь. Собору преподобных отцев Киево-Печерских, в Ближних пещерах.

Собор преподобных отцев Киево-Печерских, в Ближних пещерах (прп. Антония) почивающихСобор преподобных отцов Киево-ПечерскихМолитвы.Святыни

Столп огнезрачный и светоносное солнце, возсиявшее на горе Печерской, / великаго Антония со всем собором богоносных отец приводим Тебе, Христе, в молитву, / ихже ради молим, подаждь обители нашей благодать и душам нашим велию милость.

Тропарь. Собору преподобных отцев Киево-Печерских, в Дальних пещерах.

Собор преподобных отцов Киево-Печерских, в Дальних пещерах * Молитвы.

Мысленное солнце и светлую луну, / первоначальных Печерских, / со всем собором преподобных днесь почтим, / тии бо, церковную твердь озаряюще, / просвещают во тьме страстей бедствующих, / и подают от Христа Бога молитвами своими помощь во всех скорбех, / и душам нашим просят избавления.

Тропарь. Собору Радонежских святых.

Собор Радонежских святых * Собор Радонежских святых Икона.Молитвы.

Днесь светло празднуем, вернии людие, / преславныя Троицкия обители торжество: / се бо велий собор святых чудотворцев Радонежских, / яко дивныя птицы небесныя, / являет нам Церковь Российская, / стезями честнаго их жития шествовати всех призывающи, / к нимже, с верою и любовию притекающе, воззовем: / молитеся о нас ко Пресвятей Троице, / преподобнии отцы наши с Богоносным аввою Сергием, / мир мирови даровати / и душам нашим велия милости.

Величание. .

Собор Радонежских святых * Собор Радонежских святых Икона.Молитвы.

Величаем вас, / вси святии земли Радонежския, / и чтим святую память вашу, / вы бо молите за нас / Христа Бога нашего.

Тропарь. Собору Ростово-Ярославских святых.

Собор Ростово-Ярославских святых * Собор Ростово-Ярославских святых Икона.Молитвы.

О благочестный соборе, / о людие избраннии, / святителие, преподобнии и праведнии, / и благовернии граждане российстии, / яко звезды, на тверди церковней / страны Ростовския и Ярославския к Богу предстателие, / величаем с любовию вас, по плоти наших сродников. / Вы же молитеся даровати мир стране и Церкви нашей, / благословение и милость Божию всем людем, / всепрощение и спасение, / ходатаи бо есте приснии о нас ко Святей Троице.

Тропарь. Собору Рязанских святых.

Собор Рязанских святых * Молитвы.

Святии вси (в) земли Рязанстей и Муромстей просиявшии, / приснии наши молитвенницы и заступницы, / молите Владыку Христа Бога нашего / мир вселенней даровати и душам нашим велию милость.

Тропарь. Собору Сербских святых.

Собор Сербских СвятителейСобор сербских святителейМолитвы.

Первосвятителие Богоноснии, отцы наши, / яко просветителие сербстии, / святии первопастырие и патриарси, / истиннии хранителие апостольских преданий, / столпи непоколебимии, / Православия наставницы, / Владыку всех Христа молите / мир вселенней даровати / и душам нашим велию милость

Тропарь. Собору Сибирских святых.

Собор Сибирских святых * Молитвы.

Церкве Христовы светильницы, / всея России украшение, / святии вси, в земли Сибирстей просиявшии, / Владыку всех молите / мир вселенней даровати / и душам нашим велию милость.

Величание. .

Собор Сибирских святых * Молитвы.

Величаем вас, / святии вси в земли Сибирстей просиявшии, / и чтим святую память вашу, / вы бо молите за нас / Христа Бога нашего.

Тропарь. Собору Смоленских святых.

Собор Смоленских святых * Молитвы.

Соборе святых земли Смоленския, / водами священнаго Днепра омовенныя, / святителие, преподобнии, страстотерпцы и благовернии, / апостольскую веру соблюдшии, / се ныне, Святей Троице с Богородицею и лики Безплотных предстояще, / водами благочестия землю Русскую напаяете, / дарующе православным помощь Небесную / во утверждение веры / и спасение душ наших.

Тропарь. Собору Тверских святых.

Собор Тверских святых * Молитвы.

Иже в земли Тверской прославльшиися, / святителие, мученицы, / преподобнии, праведнии / и вси святии, / верою, подвиги благочестия, / любовию, кротостию, словом и житием / Богу благоугодившии / и венцы нетления и славы украсившиися, / молите Христа Бога нашего / даровати мир стране нашей / и душам нашим в мире спастися.

Величание. .

Собор Тверских святых * Молитвы.

Величаем вас, / страны Тверския покровители, / и чтим святую память вашу, / вы бо молите за нас / Христа Бога нашего.

Тропарь. Собору Тульских святых.

Собор Тульских святых * Молитвы.

Наста день светлаго торжества, / земля наша радуется, / и с нею Церковь Христова веселится, / в прославлении собора Тульских святых, Богу угодивших; / к ним же мы притекающе, взываем сице: / о, преславнии сродницы наши, / молите Христа Бога, / даровати миру мир, / отечеству благоденствие, / и душам нашим велию милость.

Величание. .

Собор Тульских святых * Молитвы.

Величаем вас, / святии вси, в земли Тульстей просиявшии, / и чтим святую память вашу, / вы бо молите о нас / Христа Бога нашего. Величание (святым воинам, на Куликовом поле за веру и Отечество души свои положившим): Величаем вас, / святый благоверный княже Димитрие и мученицы-воини, / и почитаем честную память вашу, / вы бо на поле Куликове за веру и Отечество души своя положивше, / подвигом любви землю Российскую прославили есте.

Тропарь. 12-ти грекам, строителям Соборной Успенской церкви Киево-Печерской лавры.

Преблаженнии и Богоноснии отцы наши, / двоенадесятице честная, / устроению великия церкве Киево-Печерския послужившии / и равноангельным житием Богу угодившии / и Того ради дерзновение велие у него стяжавшии, / молим вас прилежно, / испросите душам нашим очищение и велию и богатую милость

Тропарь. Всем святым Болгарским.

Собор ваш честный почитающе /и память святую празднующе, / святии, от болгар просиявшии, / прилежно молим вы: / Господа о всех молите, / паче же о присных, / сохранитися земли Болгарстей от всяких бед / и народу утвердитися на веки в вере Православной, / яко да, мирное житие благочестно поживше, / вкупе с вами улучим вечное Отечество / в блаженнем Христа Бога Царствии.

Тропарь. Всем святым субботы.

Апостоли, мученицы и пророцы, / святителие, преподобнии и праведнии, / добре подвиг совершившии и веру соблюдшии, / дерзновение имуще ко Спасу, / о нас Того, яко Блага, молите / спастися, молимся, душам нашим.

Тропарь. Женам-мироносицам.

Мироносицам женам при гробе представ ангел вопияше / мира мертвым суть прилична / Христос же истления явися чужд. / Но возопийте: воскресе Господь, подаяй мирови велию милость.

Тропарь. Новым Российским чудотворцам (XVI в.).

Пречестная версто, Богом возлюбленная, / отцы преблаженнии, правосла­вию наставницы, / в Небесныя обители, яко на колеснице, добродетельми взыдосте, / теплии заступницы Русския земли / и всем верным стено и утверждение, / Христу молитеся / даровати нам велию милость.

Тропарь. Отцам.

Препрославлен еси Христе Боже наш, / иже на земли отцы наша основавый, / и теми ко истинней вере вся ны наставивый, / Многоблагоутробне, слава Тебе.

Тропарь. Праотцам.

Верою праотцы оправдал еси, / от язык теми предобручивый Церковь: / хвалятся в славе святии, / яко от семене их есть Плод благославен, / без семене Рождшая Тя. / Тех молитвами, Христе Боже, помилуй нас.

Тропарь. Свв. отцам 6-ти Вселенских Соборов.

Препрославен еси, Христе Боже наш, / светила на земли отцы наша основавый / и теми ко истинней вере вся ны наставивый, / Многоблагоутробне, слава Тебе.

Тропарь. Святителям Ростовским.

Святителие премудрии, / паствы вашея учителие богопросвещеннии, / веру евангельскую в людех преумножившии, / любве Небесныя на земли достоподражательнии образи, / люди страны Ростовския и Ярославския приобщавшии спасению, / служителие воистинну Божии / и сопричастницы апостолов достойнии явилися есте, / Леонтие священномучениче, Исаие, Игнатие, Иакове, Феодоре / и златословесниче Российский Димитрие, / Христа Бога молите / о архиереех, на престоле вашем преемницех, / о людех, благочестно вас почитающих, / о стране нашей православней и о всей Христовей Церкви.

Тропарь. Святым угодникам Киево-Печерской Лавры, из среды которых вышли блаженные отцы, основавшие Обитель Почаевскую.

Приспе день светлаго торжества, / обитель Печерская радуется, / и с нею благословенная Почаевская лавра ликовствует / во псалмех и пениих и песнех духовных: / Днесь бо, яко же солнце незаходймое всем возсия, / память Преподобных и Богоносных отец Печерских, / от нихже, волею Божиею, / изыдоша первоначальницы иноческаго жития на Горе Почаевстей. / Ихже молитвами, Господи, / землю отечественную нашу в православии и мире утверди, / и помилуй всех, имущи купно о нас Молитвенницу и Заступницу Усердную, / Пречистую Матерь свою Богородицу, / от лет древних благодатно сияющую в Цельбоносней Стопе своей / и чудотворней Своей иконе во обители Почаевстей, / в просвещение и спасение душ наших.

Тропарь. Семи отрокам Ефесским.

Велия веры чудесе, / в пещере, яко в чертозе царском, / святии седмь отроцы пребыша, / и умроша без тли, / и по мнозех временех восташа, яко от сна, / во уверение воскресения всех человеков. / Тех молитвами, Христе Боже, помилуй нас.

Тропарь. Собору новомучеников Христовых во взятии Царяграда пострадавших.

Новии мученицы, / древнюю прелесть твердым борением низложившии, / вознесоша веру православных, / беззаконное бо служение уничиживше, / дерзновенно Христа проповедаша, / Бога совершенна, / и ныне непрестанно молятся / даровати нам велию милость.

Тропарь. Собору преподобных отцев Хиландарского монастыря.

Отцы наши Богоблаженнии, / Афонстии подвижницы, / Хиландарстии светильницы, непоколебимии столпи Православия, / истиннии наставницы евангельских преданий, / Владыку всех, Христа, молите / мир вселенней даровати / и душам нашим велию милость.


Материалы для этой страницы получены с сайта troparion.narod.ru
© ПРАВОСЛАВИЕ.RU